Ligei-si-ddu custu artìculu de Giùliu Angioni chi est bessiu in Sa Nuova. Chistionat de s’esotismu de tzertus scridoris sardus, chi movendi de Gràtzia Deledda, arrexonendi-arrexonendi, arribat finsas a sa scritura de is autoris de oindii, chi sighint a contai sa Sardìnnia po is stràngius, comenti dda iant a bolli is foresus, aresti, arcàica, mìtica, èpica etc. Sa chistioni est manna puru, ca in mesu ddoi at finas arrexonus de identidadi, de cunfrontu cun sa terra de is orìginis, imbentus literàrius, abisòngius de comunicatzioni e culturalis etc. totu cosa chi tocat ancora oi, a is chi si ponint a scriri e a contai in Sardìnnia.
G. Angioni
Eus chistionau custas diis de is fainas noas de Nick Rivera, Balentia e Baska e dda sigheus oi arrexonendi de un’àteru traballeddu nou chi est bessendi, su de is Ratapignata. Su Bandu s’at a nai e in Youtube podeis incumentzai a biri su primu arrecramu, su ‘promo’ chi ddi nant oi, togu meda e spassiosu comenti depit essi. Seus cuntentus meda e si-ndi prexaus ca sa mùsica sarda in dii de oi est arregalendi-sì surpresas bellas e boboetus chi si andant meda. S’atori est Franciscu Bachis, chi est finas sa trumba de custu ‘complessinu’, chi ddi narat custu amigu miu. Gosai-si-ddu abetendi sa bessida noa.
Ratapignata
Su 30 de abrili e su 1 de maju, in sa fiera de Casteddu, ant a chistionai de Is primus milli fueddus in sardu de Stèvini Cherchi, Alfa Editrice, ma ddu ant a fai de manera noa. Difatis ant a fai unu spetàculu ispirau a su traballu de Stèvini, cun is atoras Stefania Bettini e Carmen Porcu. Labai su comunicau:
Spetàculu teatrali de is atoras sardaresas Carmen Porcu e Stefania Bettini, ispirau liberamenti de su lìburu “Is primus milli fueddus / Sas primas 1000 allegas in sardu” de Stèvini Cherchi.
Ddas agatais in sa Fiera de Casteddu in sa parada de sa Provìntzia de su Campidanu de Mesu – Pad. G – su 30 de Abrili e su 1° de maju a is 6:00 de a merii…
Spàssiu assegurau po pipius a mannus – no si pagat nudda
Ajò, tocai sceti!
Casteddu
Su primu de maju po sa primu borta in Casteddu presentant su progetu Baska, su super grupu formau de Andria Còngia, Màssimu Lòriga e Frantziscu Medda Arrogalla. S’apuntamentu est in su Interno 24 de Biali Triesti e costat 5 èurus cun d-una birra giai pagada perou. Ddoi est finas Menion cun su dj set cosa sua. In su eventu de Facebook agatais finas su vìdiu nou.
Baska
Alloddus duus artìculus chi fiant giai bessius in Làcanas e La Patrie dal Friûl ma custa borta si-ddus sinnalu de su logu web cosa insoru. Aici a chini si-ddus at pèrdius in paperi imoi si-ddus torrat a ligi in formau digitali, chi ddi nant. E intantis gràtzias a is autoris po s’atentu chi s’ant donau.
Làcanas ; La Patrie
Su comunu de Santu Sparau impari a sa Provìntzia de Casteddu, at aprontau un’arcivu de fotografias de sa bidda comenti fut, gràtzias a sa lei 26 ma màssimu gràtzias a is sparadesus etotu chi ant donau is fotografias cosa insoru. Su traballu ddu ant fatu Amos Cardia e Giuanni Pilloni, arregollendi e partzendi custu scusòrgiu cuau e duncas agataus sa bidda, su sartu, sa comunidadi, s’àcua, su prèssiu etc. Totu sa memòria stòrica, ddi eus a nai, de sa bidda. Sa cosa est totu on line e su progetu est abertu po is chi bolint aciungi e donai ancoras. Ddu presentant custu sàbudu in Santu Sparau a is 6, cun is aministradoris, is circadoris e sa genti de sa bidda.
Santu Sparau
Una bella festa in Scroca, po chistionai de ollu e de pani, po biri prentzas e ainas antigas, po ascurtai poesia e sonus de canna e si fai una scapadedda a custa biddixedda de su Gerrei. A prus de totu custu, sa dii fait a fai unu bellu pràngiu anche Cadoni, chi produsit ollu ma po custa ocasioni de sa festa at cuncordau abisitas, launeddas, cun su film de Bentzon a incuru de s’Iscandula de Danti Olianas, e cumbidu; chi seis interessaus tocat a prenotai, sa spesa est 10 èurus.
Scroca ; Cadoni
Est bessiu su vìdiu nou de Nick Rivera, Michele Sarti est a nai, sonadori casteddaju de talentu. Apustis de sa torrada londinesa at sighiu a fai sa mùsica chi ddi praxit, folk/eletrònica/indie chi ddi bollaus nai, finas a sa bessida de su primu Ep de issu ‘Happy song is a Happy song’ chi at tentu bellus artìculus in is arrevistas spetzialisadas. Nick/Michele at fatu prus de 60.000 download de custu ep, o scarrigadas a ddu nai a sa sarda, chi no est pagu cosa e aicetotu ariseru a noti in Pirri, at prenu su tiatru de sa Vetreria, cun d-unu billetu a 10 èurus chi in dii de oi no est pagu mancu cussu. Torrendi a su contu, custu vìdiu ddu at girau Alessandro Rana in Solanas e est su chi at donau su tìtulu a s’album. Po is chi si bolint scarrigai su traballu de Nick, labai s’acàpiu chi bosi seu ponendi in bàsciu.
N. Rivera ; Ep
Labai duus apuntamentus allestru-allestru po oi e po cras. Custu merii a is 6 ant a presentai s’Enciclopedia de sa Mùsica Sarda. Su logu est in Santa Ìgia, in is localis nous de s’Unioni Sarda, is ‘Zunk Towers’ chi ddi nant. A is 9 oras, in sa pratza, ddoi at a essi unu cuntzertu de mùsica sarda de su connotu cun d-una bella pariga de artistas sardus, unu po dònnia calidadi de mùsica sarda chi nci teneus in logu nostu.
S’àteru apuntamentu est po cras a is 10 in su Hotel Regina Margherita, aundi Claudia Zuncheddu at a presentai su movimentu suu Sardigna libera, una formatzioni noa progressita e indipendentista. E duncas cras eus a intendi e ndi eus a sciri de prus de issa etotu. Sa presentada est aberta a totus.
C. Zuncheddu
E sigheus a chistionai de mùsica custas diis. Chi s’arregordat de cuddus piciocus americanus chi cantant a tenori, no s’eis a spantai imoi de un’àteru piciocu canadesu chi si ponit a cantai ‘Sete ispadas de dolore’ a ghitarra. No est chi siat una cantada de cuddas chi intrant in sa stòria ma comentisisiat est una cosa chi fait sèmpiri praxeri a biri a unu stràngiu interessau a sa mùsica nosta, Matthew Vaughan ddi nant.
7 ispadas
Custu òmini gei est sardu schetu, Giuanni Frigau de Mara, sardu in su fueddai e in su cumponni ca a prus de chistionai unu bellu sardu est bellu finas ponendi cantzonis. Ascurtai-sì custas curbas de issu, postas po unu molenteddu, sardu cussu puru. Ddu at arregistrau Igor Pinna in su 1969. Gràtzias a Nicolau De Notarpietro chi mi-ddu at sinnalau.
G. Frigau
