Ivo Murgia

Nossi, no apu sballiau scriendi, custus funt tres micro-contus temàticus nareus. Su tema gei si cumprendit de su tìtulu.

Micro-tontu 1

Sètzius in su barrixeddu ddoi fiant tres personis sceti, bufendi e arrexonendi. Intrau chi fut su de cuàturu, totus si fiant giraus e ddu iant conntou. ‘Ah, tui ses. E beh oi?’, ddi iant fatu ‘Nudda mancu oi. A primìtziu gei pariat ca… calincuna cositedda… ma nudda, nudda mancu oi’. Giai de unu bellu tretu de tempus si fiat ligendi unu lìburu chi ddi iant lassau ma no nci cumprendiat nudda. Si-ddu ligiat e si-ddu torrat a ligi ma no nci cumprendiat una conca de cibudda, gei ddu iat nau issu etotu. Ma cun totu cussu, dònnia dii si-ddu torràt a pigai in manus e nci torràt a provai. Is de su barrixeddu ddu sciiant e si-ndi arriant ma no ddu pregontànt, ca tanti no ndi iant a essi cumprèndiu nudda mancu cussus, e ddu sciiant, ma ddu sfutiant a su pròpiu. Gei no fiat po debadas ca cussa fiat sa bidda de is tontus.

Micro-tontu 2

Si fiat postu unu marteddu acanta de su computer. Acostumàt a si brocai cuddu impiastu de computer. Candu si fiat segau beni-beni is patatas, iat pigau e ddi iat donau una bella tzacada de marteddu. Ddu iat arrogau, acodeddus de pc apetotu, ma assumancu iat sciogau e imoi s’intendiat mellus. Tzertu su pc ddi serbiat e imoi ddi tocàt a si-ndi comporai unu nou. Nci fiat bessiu e iat tirau conca a sa butega de computer. Su piciocu in su bangu ddu iat biu de atesu. ‘La’ torrau est’ iat pensau. ‘Scumitu ca ti serbit unu computer nou ca s’àteru ddu as sfoddau’ ddi iat nau, castiendi-si-ddu a culu de ogu in su interis chi si fiat giai incarrerendi a ddi circai su pc nou. ‘Eja e comenti fais a ddu sciri?’. ‘E scumitu ca ddu as segau cun d-una tzacada de marteddu’ iat sighiu a tzèrrius de s’àtera parti de sa butega. No ddi iat arrespustu nudda. Ndi iat bogau su dinai de buciaca a pagau iat: 500 eurus. Fut torrau a domu e si fut sètziu a mesa po depi incingiai su computer nou. Su marteddu gei fiat sèmpiri a costau suu.

Micro-tontu 3

Dònnia dii a mericeddu si pinnigànt ananti de unas cantu ampuddas de binu e bufànt. E certànt. Chi fessint in domu de s’unu o in domu de s’àteru, sèmpiri nci-dda depiant acabai certendi. Sa chistioni no fiat sa polìtica o àtera cosa diaici ma sa cassa. Dònnia dii certànt po chistionis de cassa, po comenti tocàt a si cuncordai, po sa cosa de si depi ingolli, po is canis, po is cumpàngius, po is logus anca andai etc. Po partziri sa petza no certànt. Ni s’unu, ni s’àteru fiant mai andaus a cassa. Ni a giòvunus e ni a mannus, ni a solus e ni in cumpangia. No sciiant ni comenti fiat e ni comenti podiat essi su andai a cassa. Ma a cudda ora, dònnia dii, fessit àcua o fessit bentu, si depiant pinnigai, si bufànt una bella pariga de birras e certànt.