Ivo Murgia

Raccontiamo i Sardi

Ivo Murgia — Wed, 23 May 2012 12:05:28 +0000

Custu est su tìtulu de unu cuncursu fotogràficu anca si pedint de contai a is Sardus, is de oi, is chi funt sardus ca funt nàscius innoi e is chi ant sceberau de essi sardus, po una surra de arrexonis chi spetant a sa cuscièntzia de donniunu. Su cuncursu mi parit interessanti meda e arricu de stìmulus profetosus, est ca no seu bonu a tirai fotografias e mancu mi praxit puru, deghinou mi-nci femu amollau deu puru. Chi si-dda intendeis e teneis cosa de nai, amollai-si-nci bosàterus! Nci at tempus ancora e a s’acabada una bella amosta in Casteddu.

Cuncursu

Sa moda de is brunzitus

Ivo Murgia — Wed, 23 May 2012 08:12:31 +0000

Castiai-sì on line sa puntada de Velisti per Caso, su programa Rai de Susy Blady e Patrizio Roversi, anca chistionant de sa festa de Santu Efis in Casteddu. Sa cosa est interessanti ca a prus de fai biri is costùminis, sa sfilada e totu cantu, chistionant de sa moda de is brunzitus nuraxesus. S’ocasioni est sa presèntzia de Angela Demontis, chi at aprontau s’amosta de is brunzitus po sa Provìntzia de Casteddu, Il Popolo di Bronzo, chi at girau totu sa Sardìnnia e chi ancora est girendi puru. Deu puru nci apu tentu parti in su progetu ca emu tradùsiu totu is pannellus in sardu. Comentisisiat, is chi si-dda ant pèrdia, si podint biri calincuna cosa in custu filmau, ghiaus de sa mama de is brunzitus nous, torraus a fai a mannària naturali e bistius a sa moda de insandus.

Brunzitus

Sa Rai premiada in Frància…

Ivo Murgia — Mon, 21 May 2012 18:52:49 +0000

Castiai su prèmiu chi ndi at boddiu sa Rai in Frància, unu bellu prèmiu, Cogordas Award 2012, e una bella figura po su spot contras a is ‘dialetus’ chi gràtzias a sa Rai, annarona, oindii no chistionaus prus ca is de sa Rai s’ant imparau s’italianu. Deus si-ddu paghit piciocus! Gei ddu scieus ca sa televisioni de unu logu est su sprigu de cussu logu etotu e in Frància puru gei si-ndi funt acataus de is sciollòrius chi ant nau in sa Rai, e custu prèmiu, a brulla mancu a ddu nai, est po ddis arregordai cantu funt togus e balentis, bantendi-sì de su desertu culturali chi boliant e chi bolint fai aìnturu de su stadu italianu, anca s’agataus nosu sardus puru, in custu momentu stòricu. Spassiai-sì a si ligi totu s’artìculu in frantzesu, ca ddoi faint totu sa stòria, finas arremonendi is artìculus de is autoris sardus e de totu is àterus e mancu mali ca ddoi seu deu puru, giai ca seu stètiu su primu chi ndi apu chistionau in Sardìnnia.

Rai frantzesa

Artìculu de Omar Onnis in Làcanas

Ivo Murgia — Mon, 21 May 2012 18:11:44 +0000

Ligei-si-ddu custu artìculu de Omar Onnis chi est bessiu on line po s’arrevista Làcanas. Custa simana su giornali fundau e ghiau de Pàulu Pillonca est cuncordendi un’arregorta de arrexonadas cun is indipendentistas sardus a sciri ita ndi pensant de sa chistioni e comenti funt mandendi ainnantis is ideas insoru, ita ant fatu e ita tocat a fai po cresci prus e prus su progetu de una Sardìnnia indipendenti. Custa borta ddi est tocada a su presidenti de ProgReS, chi in d-un’artìculu longu e beni arrexonau, spricat su fundamentu stòricu de s’indipendentismu sardu ma finas sa parti moderna de sa chistioni anca issu puru cun su partidu, e impari a totu is àterus, funt traballendi po ddu depi spainai in mesu de is Sardus. Longhitu ma nci est su tanti diaderus.

O. Onnis

Archiologia sarda

Ivo Murgia — Fri, 18 May 2012 14:06:12 +0000

Labai ca est incumentzendi su cursu de archiologia sarda de Nicolau Dessì in Santu Pedru de Pula. Inghitzat lunis su 24 e durat 4 letzionis, sa spesa est 25 èurus. Su cursu est abertu a totus e a prus de is letzionis ant a fai calincuna scapada a biri is sìtius archiologicus de su logu. A s’acabada ant a donai un’atestau de partecipatzioni. Is àteras scedas in s’acòpiu in bàsciu.

Archiologia

Cantadas in Sìnnia

Ivo Murgia — Fri, 18 May 2012 12:32:30 +0000

Comenti eis a sciri su comunu de Sìnnia est unu de is pagus comunus sardus chi funt donendi unu pagheddu de dinai a is comitaus de is festas po cuncordai sa cantada. Imoi de pagu ant torrau a fai una delìbera po detzidi de cunfirmai custu agiudeddu donendi perou un’atentu particulari a is cantadoris de sa bidda, a is ghitarristas e a is contras. Sa chistioni est interessanti, ca s’agiudu est una cosa beni fata e finas a depi tutelai a is talentus de sa bidda, giai ca su dinai est ponendi-ddu su comunu, e est dinai de is sinniesus etotu, chentza de si serrai mai a su cunfrontu, mancu a ddu nai. E est interessanti finas ca candu nci at dinareddu in mesu, gei ddu scieus, donniunu ndi bogat aforas su peus de issu etotu…

Gràtzias a Pàulu Pilleri po sa nova.

Sìnnia

S’ùrtimu de Reverendo Jones

Ivo Murgia — Fri, 18 May 2012 09:13:48 +0000

Balla piciocus, custa borta no si potzu acudi a bessidas! E difatis no funt spaciadas ancoras. Est bessendi finas su discu nou de Reverendo Jones, s’artista maresu chi si movit intra rap e rock, sardu e italianu, mùsica e tiatru. No ddu teneus ancora su cd e duncas no podeus aciungi cosa meda, ma connosceus a s’artista e seus sigurus de sa calidadi de su traballu. Su Reverendo s’iat impromìtiu de si-ddu donai ma ancora no ndi eus biu e insandus Antonello movi-ti-ndi chi bolis a nai àtera cosa! In su interis castiai-sì unu clàssicu de issu ‘Banana e piricocu’.

R. Jones

Intervista Radio Rai on line

Ivo Murgia — Tue, 15 May 2012 14:53:18 +0000

E est on line finas custa intervista de Radio Rai chi s’at fatu Giusepi Puxeddu, a mei e a Pàulu Tzedda, aìnturu de su programa de issu ‘Aici, tanti po si stentai’. Eus arrexonau de poesia, de cantadoris, de cantadas e de lìngua, una bella mesora totu in sardu cun chistionis profetosas e de interèssiu. Gràtzias Giusepi, a si torrai a biri allestru!

Rai

S’annu chi no apu fatu nudda

Ivo Murgia — Mon, 14 May 2012 13:44:08 +0000

Custu est unu ‘micro-diàriu esistentziali chentza de grandu pretesas filosòficas’, ddu apu scritu deu unas cantu cidas a oi. Nareus ca est una sperièntzia personali chi apu bòfiu fissai scriendi-dda e chi imoi nci seu ponendi on line a dda cumpartiri cun is chi funt interessaus a sa chistioni. Gei ddu scieus ca bortas meda su chi pensaus una cosa nosta sceti est finas una sperièntzia de àtera genti, de àterus òminis e fèminas chi ant bìviu e intèndiu is pròpius cosas nostas ma mancai no ant tentu coru o s’ocasioni de ndi arrexonai cun calincunu. Cun custu spìritu apu detzìdiu innantis de dda scriri e imoi de dda pubricai. Speru chi a calincuna cosa potzat serbiri.

S’annu

De Sandro Ghiani

Ivo Murgia — Sat, 12 May 2012 15:13:10 +0000

Istèrrina po unu libbureddu chi at fatu su Comunu de Serri intitulau “Identidadi e Istòria: s’Autonomia de su Pópulu Sardu”

Sa libertadi bìvia in pràtica, o assumancu disigiada, donat sensu a sa vida e dda fait prus bella …
Oi potzu prantari una mata o mi potzu crocari conca a soli.
Cras ndi potzu segari sa mata chi apu postu aiseru o dda potzu acuari e ndi potzu prantari un’atra.
Pusticras nd’apa a pòdiri segari duas matas o pònniri sa de tres. Potzu andari faci a su padenti o faci a su desertu.
Su chi isceberaus oi cambiat sa dia de cras, ma perunu presenti dipendit feti de su chi est sutzèdiu innantis. Puita ca dònnia dia noa permitit e cumportat de isceberai a nou.
Si stùdiat su passau po isceberai sa diretzioni de su chi depeus fari in su presenti, ma ita sutzedit candu pentzaus ca su presenti est feti s’arrisultau de su chi est sutzèdiu innantis?
Sutzedit ca umperaus su passau po giustificari unu presenti chi si parit ca non teneus sa fortza de cambiari.
Nosu sardus non s’intendeus in paxi cun su mundu e nemancu cun nosu e totu.
Sa bussola nosta non sighit prus sa diretzioni de sa libertadi e parit chi no iscipiaus prus innui dda cicari.
Autonomia e indipendèntzia iant a dèpiri èssiri duus fueddus cun su pròpriu sinnificau, ma cun su tempus ddis eus donau duus sentzus diversus. Chi ddus umperaus cun sinceridai podit èssiri chi torrint a bòlliri narri sa pròpriu cosa.