Sìndigus/Aministradoris – 28 de su mesi de Argiolas 2012 – 9:30 ex Tzentru Agregatzioni Sotziali bia Aristanis n.59.
Scola: Boleis chi imparint su sardu a is fillus?
S’adòbiant in Sàrdara is Sìndigus/Aministradoris comunalis Sardus cuscientis de s’arriscu de sperdimentu de sa lìngua insoru e chi no bolint essi còmplicis de cust’arrori polìtigu-antropològicu-culturali. Issus ant delibberau in consillu comunali po pediri a sa RAS s’arrespetu de sa L 482/99 asuba de is minorias linguìsticas. Sa lei narat ca po s’imparu de sa lìngua nosta is mòdulus de preiscritzioni scolàstica depint cuntenni custa pregonta. Funt unus noranta is comunus chi ant pediu s’arrespetu de sa lei: de cuatru unu de totu is comunus sardus! At a bastai totu custu po fai aciungi una riga in d-un’arrogu de paperi? Poit’est chi si funt dèpius strobbai totu custus consillus comunali po s’arrespetu de unu deretu giai scritu in sa lei? Ma cantu bortas tocat a dd’aprovai una lei? A s’Ufìtziu Scolàsticu Regionali in su tempus passau custa pregonta dd’ant giai fata prus de una borta, totu po de badas! Speraus chi custa siat sa borta chi nc’arrennesceus. Cust’adòbiu est fintzas s’ocasioni po pediri una lei noba po s’amparu de sa lìngua. Si bolit fintzas chi sa lei previdat in manera orgànica sa presèntzia de is àteras spetzifitzidadis culturalis nostas, Stòria in primis. Un’atu chi si spetat po arrespetu de sa terra chi dd’acollit: po una scola no sceti de Sardìnnia ma Sarda puru. No boleus chi si fatzant prus fillus e fillastus; chi si trasmitat a fillus nostus unu sentidu de apartenèntzia identidàriu chi ddus pesit e ddus fatzat cresci castiendi a su mundu cun sa cuscièntzia de apartenni a unu pòpulu chi at donau e bolit sighiri a donai, cun is spetzifitzidas suas, su contributu a sa tziviltadi.
Giampaolo Pisu
Consilleri delegau a sa lìngua sarda – Sàrdara