UNU SITU PO SA BANDERA SARDA

On line su primu situ po sa bandera sarda. Ddui at pàginis po sa stòria de su sìmbulu natzionali sardu, po is fotografias, po is disterraus nostus, po aprofondimentus e cumentus chi is interessaus podint imbiai. Chistionis interessantis e utilosas chi totus podeus amanniai pighendi parti a sa vida de su situ.
Curiosa sa chistioni chi siat prus "sarda" sa bandera de is cuatru morus o s’àrburi sderrexinau de Arbarei. Sendi ca deu no seu unu stòricu m’est traballu su depi aprofondiri custa chistioni. Apu lìgiu calincuna cosa e cumprendu is arrexonis de chini iat a bolli proponni de cambiai su sìmbulu e de torrai a s’àrburi de Arbarei. Una cosa est sigura perou, is cuatru morus funt unu de is pagus sìmbulus chi si unint apari, chi bieus in dònnia logu, cun banderas beni spratas in totu is manifestadas finas in continenti e in s’èsteru, chentza de colori polìtigu ma chi sinnàlant sa presèntzia de unu sardu o de cosa sarda.
Connoscendi cumenti seus is Sardus, malus a si stimai apari, est giai giai unu miràculu.
Imoi a tocai unu de is pagus seguresas chi teneus e una de is pagus cosas chi si pinnìgant apari mi parit una cosa dilicada diaderus. Deu, chi depu nai su parri cosa mia, nc’emu a pensai beni innantis de ddu fai.
Is chi tenint cosa de nai apitzus de custu arrexonu podint scriri a su giassu:
www.bandierasarda.it